Сайт тест режимида ишламоқда.
ЎЗБЕКЧА | РУССКИЙ

Телефонлар:
(0372) 226-00-11
(0372) 226-31-32
» » Форишнинг фаол тадбиркори

Форишнинг фаол тадбиркори

12 октябрь 2018 йил
73
0

Тарихдан оилавий муносабатларни бошқаришда, асосан ота-онанинг, ёши улуғларнинг ўрни беқиёс бўлган. Ғарб мамлакатларида оилавий муносабатларнинг инқирози кечаётган бир паллада юртимизда бу масалага катта аҳамият қаратилмоқда.

Кечқурун оила жамулжам бўлган вазиятни тасаввур қилиб кўринг. Дастурхон атрофида ўтириб, ота-она фарзандлари билан кунни қандай ўтганлиги ҳақида суҳбатлашмоқда. Болалар мактабда нима бўлганини ҳаяжон билан айтиб беришса, ишга борадиганлар бугунги меҳнат куни қандай унумли ўтгани-ю нима муаммоларга дуч келиб уни қандай бартараф қилганини тўлқинланиб сўзлашади. Бу эса оиланинг ҳар бир аъзоси учун эртанги кунга нисбатан умидни, кўтаринкиликни пайдо қилади.

Камол ака Ибодов оиласи туманимизда кўпчиликка намуна сифатидан танилган. Энг намунали, меҳнаткаш оилалардан бири, фарзандлари ҳам ота-оналарига муносиб, дея ижобий фикр билдиришади, кўпчилик.

Камол Ибодовнинг асли касби биолог. Самарқанд давлат университетини битириб, бир неча йил мактабда ўқитувчилик қилди, ёшлигидан табиат шайдоси. Шу боис доим табиат қўйнига интилади. Унинг сир-синоатларидан баҳра олишга, борлигича сақлаб, табиат неъматларини кўпайтиришга интилади.

Камол Ибодовнинг бу хислатларини пайқаган туман ўрмон хўжалиги жамоаси у кишини ўз жамоаларига ишга таклиф қилишди. Дастлаб ўрмон хўжалигида ҳосилот, кейинчалик эса туман ўрмон хўжалиги директори вазифаларида фаолият юритди. Бу соҳада ўттиз тўрт йил фаолият юритаркан, сабр-тоқат, матонат билан меҳнат қилиб, ўрмон хўжалигини ривожлантириш, тоғ ва адирларни боғ-роғларга буркаш, ноёб доривор ўсимликларни сақлабқолиш ва кўпайтириш ишига ўз ҳиссасини қўшди. Бу борада бошқаларга ҳам талабчан муносабатда бўлди. Униб-ўсиб келаётган ёш авлод онгида она табиатга меҳр уйғотиш, уни асраб-авайлаш борасида ёшлар билан дилдан суҳбатлашди.

Камол Ибодов оиласини тумандаги энг ибратли оилалардан бири дедик. Ҳақиқатдан ҳам шундай. Турмуш ўртоғи Ойкарам опа билан 10 нафар ўғил-қизларни оқ ювиб, оқ тараб эл корига ярайдиган, асосийси одобли-ахлоқли инсонлар қилиб вояга етказишди. Ойкарам опанинг асли касби ўқитувчи. Самарқанд хотин-қизлар педагогика билим юртини тугатиб, 28 йил давомида Қўлба қишлоғида 12-умумтаълим мактабида ўғил-қизларга бошланғич таълимдан сабоқ бериш билан бирга, Камол акага фарзандлар тарбиясида суянч, қанот бўлди.

Камол ака ҳам, Ойкарам опа ҳам нафақага чиққанларидан кейин тиниб-тинчиб ўтиришмади. Янгиликка, яратишга интилишди. Ўғиллари Орол, Бахтиёр, Аҳмад, Абулқосим, келинлари Феруза, Нилуфар, Манзура, Ойгулларни ёнларига олишиб, 2006 йилда чорвачиликка ихтисослашган «Ибот ота» фермер хўжалигини ташкил этишди. Дастлаб 50 бош соғин сигир билан иш бошлаган бўлса, йилдан-йилга моллар бош сони кўпайиб, маҳсулдорлиги ҳам ошиб борди. Туман аҳолисини, касалхона, мактабгача таълим муассасаларини арзон ва сифатли гўшт ва сут маҳсулотлари билан таъминлашни йўлга қўйишди. Туман марказида фермер хўжалигининг аҳолига арзон гўшт сотадиган савдо дўкони ташкил этилди. Фермер хўжалигини ривожлантиришда «Ўзавтосаноат» акциядорлик компанияси ҳар томонлама кўмак берди.

Михин қишлоғи ҳудудидаги тоғ ён бағридан 3 гектар ер олиб боғ ташкил этилди, чиройли дам олиш маскани яратилди.

Камол ака, Ойкарам опа бугун 80 ёшни қоралаб қолган табаррук инсонлар. Тўй-маъракаларнинг тўри уларники. Юзлари тиниқ, вужудларидан ғайрат ёғилиб туради. Улар 36 нафар неваралари, 13 нафар эвараларнинг суюкли бобо ва бувилари. Меҳр-муҳаббат,ҳамжиҳатлик асосида қурилган оилани ризқ, қут-барака ҳеч қачон тарк этмайди.

Рашид Каримов 

скачать dle 12.0
Муҳокамага қўшилинг
Фикр билдириш
Изоҳлар (0)
Фикр билдириш
Кликните на изображение чтобы обновить код, если он неразборчив
Фойдали ҳаволалар