Жаҳон чемпионати кумуш медали совриндори Жиззахлик Ойбек Жураев тантанали кутиб олинди

Ойбек Жураев: “Ишонтириб айтаманки, сизларни ҳали кўп марта хурсанд қиламан”
Тошкент шаҳрида бўлиб ўтган бокс бўйича катталар ўртасидаги жаҳон чемпионатида муваффақиятли иштирок этиб, кумуш медални қўлга киритган Ойбек Жураев тантанали кутиб олинди. ОЙБЕК туғилиб ўсган хонадони унинг яқинлари, дўстлари, катта-кичик ёшдаги спорт ихлосмандлари, маҳалла аҳли билан тўлиб-тошди.

Пахтакор тумани ҳокими Асилбек Ашуров чемпионни олқишлар экан, уни камолга етказган, спорт билан мунтазам шуғулланиши учун муносиб шароит яратиб берган ота-онасига ва яқинларига миннатдорлик билдирди.

– Энг аввало, ота-онамга таъзим қиламан, – деди ёш боксчи. – Шу кунга етиб келишимга, шон-шуҳрат қозонишимга улар сабабчи. Қолаверса, биринчи устозимга, ҳамма-ҳаммангизга минг раҳмат. Қўллаб-қувватлаганингиз, қайғурганингиз, интизор бўлиб кутганингиз учун ташаккур. Ишонтириб айтаманки, сизларни ҳали кўп марта хурсанд қиламан