Суперлига: “Сўғдиёна”нинг қўли баланд келди

Жиззах шаҳридаги марказий “Сўғдиёна” стадионида футбол бўйича Ўзбекистон чемпионати суперлигасининг 2-туридан ўрин олган Жиззахнинг “Сўғдиёна” ва Самарқанднинг “Динамо” профессионал футбол клублари ўртасида учрашув бўлиб ўтди.

Кучли ёмғир остида ўтган баҳснинг биринчи бўлим дастлабки 20 дақиқасида меҳмонлар, 2 йиллик танаффусдан сўнг суперлигага қайтган “Динамо” футболчилари Жиззахга шунчаки келмаганликларини исботлаш мақсадида мезбонлар дарвозаси олдида бир неча бор хавфли вазиятларни вужудга келтириб, бироз бўлса-да ўйинда устунлик қилди.

Биринчи бўлимнинг иккинчи ярмида “Сўғдиёна” майдондаги устунликни ўз қўлига олди. Рақиблари дарвозаси олдида хавфли вазиятларни юзага келтирган бўлсалар-да, биринчи бўлимда “Динамо”чилар посбони Милое Прекович ҳам, “Сўғдиёна” голкипри Милан Митрович ҳам ўз дарвозалари дахлсизлгини сақлаб қолди. Жамоалар 0:0 ҳисобида танаффусга чиқди.

Ниҳоят учрашувнинг 66-дақиқасида жаримадан Лука Чермель томонидан узатилган тўпга ҳаммадан аввал улгурган “Сўғдиёна”нинг ўтган мавсумдаги тўп урари Шохруз Норхонов боши билан самарқандликлар дарвозасига гол киритиб ҳисобни очди – 1:0.

Воҳа дербиси номини олган, икки қўшни Жиззах ва Самарқанд вилоятлари клублари ўртасидаги баҳсда ана шу 1:0 ҳисоби ўйин охиригача сақланиб қолди.

“Сўғдиёна” мавсумдаги илк ғалабаси ва дастлабки голини тантана қилган бўлса, ажойиб ўйин намойиш этишига қарамай “Динамо” 2-турда ҳам мағлубиятини тан олишга мажбур бўлди.

Эслатиб ўтамиз, 1-турда “Сўғдиёна” Тошкентда “Бунёдкор” билан 0:0, “Динамо эса ўз майдонида “Пахтакор” билан 0:2 ҳисобини қайд этган эди.

Ушбу учрашувнинг “Энг яхши футболчиси” деб жиззахликлар ҳужумчиси, ўйиндаги ягона гол муаллифи Шохруз Норхонов топилди.