Тест синовларини ўтказиш учун марказий стадионнинг сунъий қопламали машғулот майдонида 1 минг 620 нафар ўқувчи учун жой тайёрланиб, ҳар бир сменада 1 минг 620 ўқувчи тест синовларида иштирок этди. Тест синовлари тўлиқ видеокузатув қурилмалари орқали назорат қилиб турилди.
“Cambridge Assessment” ташкилоти талабларига кўра, тест синовларидан аввал 23-24 июль кунлари репетиция жараёни ўтказилиб, барча ўқувчилар тест синовлари ўтказиладиган жойлар ва тест синовлари тартиб-қоидалари билан назоратчилар томонидан атрофлича таништирилди.
Тест синовларига кириш олдидан ўқувчиларнинг тана ҳарорати ўлчаниб, антисептик воситалар билан дезинфекция қилинди ва Давлат тест маркази томонидан тест синовларида иштирок этиш учун келган ҳар бир ўқувчи тиббиёт ниқоблари, бош кийим (кепка) билан тўлиқ таъминланди. Шунингдек, ҳар бир ўқувчига қора қалам, резина ўчирғич, ичимлик суви берилди.
Ҳар сменада 10 нафар тиббиёт ходими, 1 та махсус тез ёрдам автомобили, 30 нафар Миллий гвардия, 10 нафар ички ишлар вилоят бошқармалари хизматчилари навбатчилиги тўлиқ йўлга қўйилди.
Тест синовларига турли сабабларга кўра, 150 нафар ўқувчи келмади.
“Cambridge Assessment” ташкилоти вакилларининг таъкидлашича, Президент мактабига кириш тест синовларининг биринчи босқич натижалари август ойининг иккинчи ўн кунлигида эълон қилинади. Тест синовларининг дастлабки босқичи ниҳоясига етди ва 2-босқич синовлари жорий йилнинг 20-25 август кунлари ўтказилиши назарда тутилган.
А.Қаюмов, Ж.Ёрбеков (сурат)
