Мамлакатимизни ривожлантиришнинг бешта устувор йўналиши бўйича Ҳаракатлар стратегияси доирасида жамоатчилик назорати механизмларини амалда татбиқ этиш, юртимизни ҳар томонлама ва жадал ривожланишида фуқаролик жамияти институтлари ролини кучайтириш белгиланган.
Шу мақсадда “Юксалиш” умуммиллий ҳаракати нодавлат нотижорат ташкилотлари ходимларининг салоҳияти ва касбий билимларини ошириш, уларнинг иқтисодий, ижтимоий ва маданий соҳалардаги лойиҳаларини қўллаб-қувватлаш йўналишда бир қатор ташаббусларни ҳаётга татбиқ этиб келмоқда.
Ушбу фаолиятни давом эттирган ҳолда, “Юксалиш” умуммиллий ҳаракати Конрад Аденауэр номидаги фонднинг Марказий Осиёдаги ваколатхонаси молиявий кўмаги ёрдамида Зомин туманида учинчи бор “ННТлар мактаби”ни ташкил этди.
Маълумот ўрнида айтадиган бўлсак,“ННТлар мактаби” лойиҳаси 2020 йилда йўлга қўйилган бўлиб, шу вақтга қадар Хоразм ва Навоий вилоятлари ҳамда Қорақалпоғистон Республикасидан 50 нафар ННТ вакиллар ўқитилди.
Зомин туманида уюштирилган тадбирга Ўзбекистоннинг турли вилоятларидан 20 та нодавлат нотижорат ташкилотлари вакиллари жалб этилди. 4 кун давом этган семинарда ташкилий ривожланишнинг етакчилик ва стратегик бошқаруви, дастурлар ва хизматлар бошқаруви, лойиҳалар ёзиш, ННТлар фаолиятининг тарғиботи, жамоатчилик билан алоқалар бўйича билимлар оширилди.
Албатта, бу шаклдаги ўқув машғулотлари соҳа вакиллари учун илғор тажрибаларини алмашиш, сифатли таълим олиш, яқиндан танишиш, ННТлар учун долзарб бўлган муаммоларни муҳокама қилиш ва биргаликда ечим излаш имкониятини беради.
Семинар тренинглар якунида “ННТлар мактаби”нинг битирувчиларига “Юксалиш” умуммиллий ҳаракати ва Конрад Аденауэр номидаги фонднинг Марказий Осиёдаги ваколатхонаси томонидан сертификатлар ҳамда эсталик совғалари топширилди.
Музаффар МАМАТҚУЛОВ,
“Юксалиш” умуммиллий ҳаракати Жиззах
вилояти ҳудудий бўлинмаси бош мутахассиси,
Халқ депутатлари Жиззах шаҳар Кенгаши депутати.
скачать dle 12.0
