Давлат хизматлари агентлиги: “Биз 4 ёшдамиз!”

Жиззах шаҳрида “Давлат хизматлари агентлиги: “Биз 4 ёшдамиз!” шиори остида қатор тадбирлар ташкил этилди.

Дастлаб, бошқарма тизимидаги автомашиналар карвонига старт берилди. Жиззах шаҳрининг “И.Каримов – А.Навоий – Шароф Рашидов” шох кўчалари йўналиши бўйлаб махсус автобус  ва транспорт воситалари ҳаракатланди.

Шундан сўнг янгидан таъмирланган Жиззах шаҳар ФҲДЁ бўлими, “Бахт уйи”нинг тантанали очилиш маросими ўтказилди. Тадбирда сўз олган ДХА Жиззах вилоят бошқармаси бошлиғи Б.Умурзаков Муҳтарам Президентимизнинг 2020 йил 18 февралдаги ПФ–5938-сон Фармонига асосан 2020 йилнинг 1 апрелидан бошлаб, ФҲДЁ органлари Адлия вазирлиги ҳузуридаги Давлат хизматлари агентлиги тасарруфига ўтказилганлиги, мазкур Фармон билан Агентликка ФҲДЁ органларининг ишини тизимли назорат қилиш, малакали кадрларни танлаш ва жой-жойига қўйиш, ҳуқуқни қўллаш амалиётини мувофиқлаштириш, “ФҲДЁнинг ягона электрон архиви” ахборот тизимини юритиш ва ФҲДЁ органларининг ҳудудий архивларига раҳбарлик бўйича функциялари юклатилганлиги хусусида гапирди.

Ўтган 2020 йилда Жиззах вилоятидаги барча туманлардаги Давлат хизматлари марказлари янги биноларда тўлиқ иш бошлаган эди. Ҳозирда Мирзачўл, Дўстлик, Зафаробод, Бахмал, Пахтакор, Ғаллаорол, Зарбдор, Янгиобод туманларида ФҲДЁ бўлимлари Давлат хизматлари марказларининг янги қуриб фойдаланишга топширилган барча қулайлик ва шароитлари мавжуд замонавий биноларига кўчириб ўтказилди ва фаолият кўрсатмоқда.

Жиззах шаҳар, Ш.Рашидов ҳамда Зомин туман  ФҲДЁ бўлимлари эса алоҳида бинога эга бўлиб, ушбу бинолардаги шароит бугунги кун талабларига жавоб бермай қолган эди. Мазкур ҳолатни инобатга олган агентлик раҳбарияти ушбу биноларни таъмирлаш учун маблағ ажратди. Ҳозирда ушбу 3 та туманда Фуқаролик ҳолати далолатномаларини ёзиш бўлимлари бинолари қайта таъмирланиб, яқин кунларда аҳолига туҳфа қилиниши кутилмоқда.

Тантанали тадбирда рамзий лента қирқилгач иштирокчилар бино ичкарисида яратилган шароитлар билан яқиндан танишдилар. Шу куни никоҳи қайд этилаётган ёшларга янги оила қуриганликлари муносабати билан гувоҳномалари йиғилганлар иштирокида топширилди.

Шундан сўнг, “Висол” тантаналар мажмуасида “Давлат хизматлари агентлиги: “Биз 4 ёшдамиз!” шиори остида байрам тадбири бўлиб ўтди. Унда Давлат хизматлари агентлиги Жиззах вилояти бошқармаси томонидан 2018-2019-2020 йиллардаги фаолияти якунлари ва 2021 йилда амалга оширилган устувор вазифалар юзасидан бошқарма бошлиғи Бобур Умурзаковнинг маъруза қилди.

Маърузада мамлакатимизда давлат хизматларини кўрсатишнинг миллий тизимини тубдан ислоҳ қилиш бўйича кенг миқёсда бошланган ишлар доирасида бошқарма томонидан амалга оширилган ишлар тўғрисида маълумот берилди.

Анжуманда соҳани ёритишда ҳамкорлик қилган ОАВ вакилларига ҳамда тизимда самарали натижаларга эришган ходимларга бошқарманинг ташаккурномаси, фахрий ёрлиқ ва эсдалик совғалари топширилди. 

Жиззах вилоят филармонияси томонидан ташкил этилган бадиий дастур байрамга ўзгача шукуҳ бахшида этди.

ДХА Жиззах вилоят бошқармаси Ахборот хизмати