Жорий йилнинг сентябрь ойининг сўнги декадасида мамлакатимизнинг барча ҳудудларида "Соғлом ва маънавий етук авлод –юрт келажаги” шиори остида "Болалар китоби” IV республика анъанавий фестивали бўлиб ўтди.
Вилоятимизнинг Ҳамид Олимжон ва Зулфия хиёбонида ташкил этилган тадбирда жамоат ташкилотлари вакиллари, шоир-ёзувчилар, ахборот ресурс марказлари вакиллари, таълим муассасаларининг ўқитувчи ва ўқувчилари иштирок этдилар.
Вилоят матбуот ва ахборот бошқармаси, халқ таълими бошқармалари, Ўзбекистон Ёзувчилар уюшмаси вилоят бўлими, вилоятболалар кутубхонаси ҳамкорлигида ташкил этилган тадбирда китоб мутолааси ва китобхонлик маданиятини ошириш юзасидан амалга оширилаётган кенгқамровли ишлар халқимиз, айниқса, ёш авлоднинг маънавий-интеллектуал салоҳиятини ошириш, уларда Ватанга муҳаббат, истиқлол ғояларига садоқат, миллий ва умуминсонийқадриятларга ҳурмат туйғусини мустаҳкамлашида алоҳида таъкидланди.
Президентимизнинг 2017 йил 13 сентябрдаги "Китоб маҳсулотларини нашр этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғиб қилиш бўйича комплекс чора-тадбирлар дастури тўғрисида”ги Қарори бу борадаги ишларни янги босқичда давом эттиришда муҳим дастуриламал бўлаётир.
Икки кун давом этган мазкур фестиваль ана шундай эзгу мақсадларга йўналтирилди.
–Юртимизда китобхонлик маданиятини юксалтиришга катта эътибор қаратилаётгани жуда яхши иш бўлди, – дейди вилоят матбуот ва ахборот бошқармасининг бош мутахассиси Сайёра Мавланова. –Айни пайтда вилоятда 10 дан зиёд кутубхона ва ахборот-ресурс маркази, 20 дан ортиқ китоб дўкони китобхонларга сифатли хизмат кўрсатмоқда. Жойларда замонавий қулайликларга эга янги китоб дўконлари қурилиб, фойдаланишга топширилмоқда. "Энг намунали китоб дўкони” кўрик-танлови ва бошқа тадбирлар ўтказилмоқда.
Фестиваль доирасида ўқувчи-ёшлар учун мўлжалланган китоблар кўргазмаси ташкил этилди. "Билимдон болажон” викторинаси ва мушоиралар ўтказилиб, билимдон ёш китобхонлар муносиб рағбатлантирилди.
–Тадбирда "Зумрад ва Қиммат”, "Олтин тарвуз”, "Ур тўқмоқ” каби ўзбек халқ эртакларидан энг сараларини ўқиб бердим, – дейди Жиззах шаҳридаги 19-умумтаълим мактабининг 2-синф ўқувчиси Гулсанам Шерзодова. – Бунинг учун менга китоб совға қилишди. Бу мени янада кўпроқ мутолаа қилишга, фанларни чуқур ўзлаштиришга руҳлантирди. Тадбирда ўтказилган мушоирадан илҳомланиб, ёзган машқларимдан ўқиб бердим. Шеърларим кўпчиликка манзур бўлганидан хурсандман.
Икки кун давом этган анъанавий фестиваль тадбир иштирокчиларига кўтаринки руҳбағишлади.
Шаҳноза Юлдашова
скачать dle 12.0
