Бахмал туманида Ватанпарварликка чорловчи тадбир ўтказилди

Жиззах вилояти Бахмал туманида Ўзбекистон Республикаси Қуролли Кучлари ташкил этилганининг 27 йиллиги ҳамда Ватан ҳимоячилари куни муносабати билан эълон қилинган ватанпарварлик ойлиги доирасида “Ватан – муқаддас, уни ҳимоя қилиш шарафли бурчдир!” шоири остида тадбир ўтказилди. 

Унда фахрийлар, давлат ва жамоат ташкилотлари вакиллари, ёшлар иштирок этди. 

– Тадбирда мамлакатимиз мудофаа салоҳиятини юксалтириш борасида амалга оширилаётган кенг кўламли ислоҳотлар ва уларнинг самаралари алоҳида таъкидланди, – дейди иштирокчи Сарвар Усубалиев. – Жойларда ташкил этилаётган бундай тадбирлар ёшларни ҳарбий-ватанпарварлик руҳида тарбиялаш, улар қалбида Ватанга садоқат туйғусини юксалтиришда муҳим аҳамият касб этади. 

Ҳарбий техника ва қурол-аслаҳалар кўргазмаси ҳамда ҳарбийларнинг жанг санъати чиқишлари намойиш этилди.