Мамлакатимизда ҳуқуқий демократик давлат ва кучли фуқаролик жамияти барпо этиш жараёнида инсон ҳуқуқ ва эркинликларини таъминлаш, фуқароларнинг ҳуқуқий, ижтимоий-маънавий фаоллигини юксалтиришга алоҳида эътибор қаратилмоқда.
Жиззах вилоятида ҳам аҳоли, айниқса, ёшларнинг ҳуқуқий маданиятини ошириш, янги қонун ва бошқа меъёрий ҳужжатлар мазмун-моҳиятини тушунтиришга бағишланган турли тадбирлар ташкил этилаётир.
Шу мақсадда Ўзбекистон “Адолат” социал-демократик партияси Сиёсий Кенгаши Марказий аппарати ҳамда Жиззах вилояти Кенгаши ташаббуси билан Ғаллаорол туманидаги Хотира ҳиёбонида “Биз коррупцияга қаршимиз” шиори остида митинг ташкил этилди.
Хотира ҳиёбони ва унинг атрофида сайл кўринишида бўлиб ўтган мазкур тарғибот тадбир партиянинг Марказий аппарати маъсул ҳодимлари, партиянинг вилоят Кенгаши фаоллари, кенг жамоатчилик вакиллари, маҳалла оқсоқоллари ва ёшлар, хотин-қизлар, маҳалла фаоллари билан гавжум бўлди.
Оммавий ахборот воситалари ва ижтимоий тармоқлар орқали мазкур тадбир ҳақида эълон берилганлиги сабабли тадбир иштирокчилар сони кўпайиб борди.
Тадбирнинг биринчи қисмидан ўрин олган митингда сўзга чиққан Ўзбекистон “Адолат” СДП Сиёсий Кенгаши маъсул ҳодими Улуғбек Расулов, партиянинг вилоят Кенгашининг раиси Ориф Шукуров, Ўзбекистон ёшлар иттифоқи вилоят Кенгаши раиси ўринбосари Шохида Даманова ва бошқалар коррупция мамлакат ижтимоий-иқтисодий тараққиётига улкан таҳдид бўлиб, у жамиятнинг маънавий-ахлоқий асосларини емириши, ислоҳотлар ғоясини обрўсизлантириб, фуқароларнинг жамият ва давлат ишларини бошқаришдаги иштирокига салбий таъсир кўрсатиши, давлат органлари, ташкилотлар ва фуқаролик жамияти институтлари томонидан коррупциянинг олдини олишда амалга оширилаётган чора-тадбирлар самарадорлигини ошириш, жамият ҳаётининг барча соҳаларида фуқароларнинг ҳуқуқий онги ва маданиятини юксалтиришга қаратилган фикрларини билдириб ўтишди.
Дарҳақиқат, ҳозирги кунда коррупция нафақат кундалик ижтимоий муносабатларни издан чиқарувчи, балки давлатларнинг ичидан емирилишига олиб келувчи хавфли иллатдир. Коррупция давлатимизнинг ривожланишига ҳамда миллий хавфсизлигимизга таҳдид солади.
Давлатнинг конституциявий асосларини хамда жамиятнинг маънавий-ахлоқий асосларини емиради, демократик институтлар ва қонун устуворлигини кучсизлантиради, фуқароларнинг ҳуқуқ ва эркинликларини жиддий тарзда бузилишига олиб келади. Коррупция уюшган жиноятчиликни, терроризмни ва инсоният хавфсизлигига қарши қаратилган бошқа таҳдидларнинг ўсишига ёрдам беради.
Коррупция халқнинг давлатга ишончини пасайтиради, жамиятнинг ахлоқий асосларини емиради, ижтимоий-иқтисодий муаммоларнинг чуқурлашишига сабаб бўлади. Коррупция тизгинланмаса, тараққиёт йўлида қилинаётган ислоҳотлар, ўзгаришлар ўз самарасини бермайди.
Қолаверса, коррупция даражасининг юқорилиги мамлакатнинг халқаро миқёсда обрўсини туширадиган, инвестициявий муҳитга салбий таъсир кўрсатадиган омилдир. Шу боис коррупция билан муроса қилиб бўлмайди, “бутун дунёда бор”, “коррупцияни барибир енгиб бўлмайди” каби важлар билан уни ўз ҳолига ташлаб қўйиш ҳам мумкин эмас. Коррупцияни фақат тубдан йўқ қилиш ҳақида ўйлаш керак.
Сайл доирасида партиянинг қошида ташкил этилган “Истеъдод клуби”нинг фаол аъзолари томонидан расмлар, тўқилган ўйинчоқлар, китоблар кўргазмаси, турли хил интерактив ўйинлар, совринли викториналар ўтказилди.
Кўргазмалар ва турли хил ўйинлар иштирокчилар ва ёшларни ўзига жалб этиб, фаол қатнашишга ундади. Хонандаларнинг куй-қўшиқлари, бадиий жамоаларнинг чиқишлари тадбир қатнашчиларига улкан завқ-шавқ олдилар. Фуқаролар томонидан бундай кўнгилочар учрашувлар кўплаб ўтказилиши лозимлигини таъкидлади. Тадбирда фоал қатнашган иштирокчилар партиянинг турли хил эсдалик совғалари ва фахрий ёрлиқлари билан тақдирланди.
Бундай тадбирлар вилоятимизнинг барча туманларида давом этади.
Достон ЗОКИРОВ,
Ўзбекистон “Адолат” СДП
вилоят Кенгаши
Матбуот котиби
скачать dle 12.0
