– Партиямиз ташкил этилганига 18 йилдан ошган бўлса-да, шу кунгача O’zLiDeP Жиззах вилоят кенгаши ўз биносига эга эмас эди, – дейди халқ депутлари вилоят Кенгаши депутати, партия фаоли, тадбиркор Фарҳод Одилов. – Бугун мана янги бино партия фаоллари ихтиёрига топширилди. Янги йил байрамига маслакдошларимизга туҳфа қилинган маъмурий бинодаги шарт-шароитларни кўриб, ҳавасимиз келди. Чунки, бу партия вилоят кенгаши ходимларининг, депутатларимизнинг, маслакдошларимизнинг ислоҳотлар жараёнига қўшаётган муносиб ҳиссасига кўрсатилган эътирофдир.
Охирги беш йилликдаги маълумотларни таҳлил қиладиган бўлсак, 2016 йилда бошланғич партия ташкилотлари 582 тани ташкил этган бўлса, бугунги кунда уларнинг сони 862 тага етди. Партия аъзолари сони эса 2016 йилдаги 17 минг 122 нафардан 80 минг нафар бўлди. Бу эса партия сафида бўлиш истагидаги фаол, фидойи ҳамюртларимиз сони ортиб бораётганини кўрсатади. Қувонарлиси, улар орасида ёшлар кўпчиликни ташкил этади.
– Айни пайтда, халқ депутатлари вилоят Кенгашининг 27 нафарини ёки бошқача айтганда уларнинг 47,4 фоизини, халқ депутатлари туман ва шаҳар Кенгашларининг 119 нафари ёки 35,1 фоизини O’zLiDeP депутатлик гуруҳи аъзолари, электорат вакиллари ташкил этади, – дейди O’zLiDeP Жиззах вилоят кенгаши аппарат раҳбари Шерзод Маматқулов. – Улар тадбиркорлар ва фермерларимизнинг манфаатларини ҳимоя қилиш, уларни ҳар томонлама қўллаб-қувватлаш билан бир қаторда, ҳудудларда аҳолини қийнаб келаётган кўплаб муаммоларни бартараф этишга муносиб ҳисса қўшиб келмоқда.
“Маҳаллабай” ишлаш тизими йўлга қўйилгач, депутатлар, партия фаоллари, маҳаллий ҳокимлик вакиллари, секторлар раҳбарлари ҳамда ўзини-ўзи бошқариш органлари ходимлари, ҳамкор ташкилотлар билан биргаликда уйма-уй юриб, аҳоли муаммоларини ўрганиш, уларни бартараф этиш йўлларини излаш, шунингдек, томорқа хизматини ривожлантиришга муносиб ҳисса қўшиб келмоқда.
Партия фаоллари ихтиёрига топширилган мазкур бино партия вилоят кенгаши таркибидаги бошланғич партия ташкилотлари фаолиятининг янада самарали бўлишига ҳисса қўшиши шубҳасиз.
А.Қаюмов
