Жиззахда “Яшил энергия” платформаси амалда

Жиззах вилоятида Президентимизнинг жорий йил 12 майдаги “Яшил энергия” сертификатлари тизимини жорий этиш чора-тадбирлари тўғрисида” ги қарори ижросига алоҳида эътибор қаратилмоқда.

Жумладан, Ўзбекистон Миллий университетининг Жиззах филиалига замонавий қуёш панеллари ўрнатилгани фикримизнинг ёрқин исботидир.  

Жиззах вилояти божхона бошқармаси бошлиғи Ш.Салихов ЎзМУ Жиззах филиалида Президентимизнинг  мазкур қарори ижроси доирасида амалга оширилган ишлар билан танишди. Айни пайтда ЎзМУ Жиззах филиали ҳудудидаги 280 ўринли талабалар турар жойини тўлиқ иссиқ сув билан таъминлаш мақсадида 10 дона (2 минг литр сув иситишга мўлжалланган) геоколлектор қуёш сув иситиш қурилмалари ўрнатилган бўлиб, талаба- ёшлар сув учун 100 фоиз муқобил энергиядан фойдаланмоқда.

Шунингдек, олийгоҳ Жиззах филиали ҳудудидаги ташқи ёритиш чироқлари тўлиқ электр тармоғидан узилиб, қуёш панелли замонавий ташқи ёритиш чироқлари ўрнатилган. 2023 йилда филиалнинг йиллик электр энергия сарфини тўлиқ муқобил энергия ҳисобидан қоплаш мақсадида қуввати 110 кВт бўлган қуёш панеллари ўрнатилди.  

Бундан ташқари, жорий йилнинг 2-чорагидан бошлаб, қуввати 130 кВт бўлган қуёш панелли станция “Яшил энергия” платформасига киритилди ва Жиззах вилояти ҳудудий электр тармоқлари корхонаси билан шартнома имзоланди.

Мухтасар қилиб айтганда, юртбошимизнинг жорий йил 12 майдаги “Яшил энергия” сертификатлари тизимини жорий этиш чора-тадбирлари тўғрисида” ги қарори ижроси Жиззах вилоятидаги мутасаддиларнинг доимий эътиборида.