Зўравонликка қарши ҳамкорлик

  Ўзбекистонда Бирлашган Миллатлар Ташкилоти Бош Ассамблеяси томонидан эълон қилинган 25-ноябрь Халқаро аёлларга нисбатан зўравонликка барҳам бериш кунига бағишланган 2023-йил 25-ноябрдан 10-декабргача “Биз зўравонликка қаршимиз” 16 кунлик акцияси бўлиб ўтмоқда. Акция доирасида Европа Иттифоқи молиявий кўмагидаги Saferworld халқаро ташкилоти ҳамда Жиззах вилоят “Istiqlol avlodi” ижтимоий-иқтисодий, ҳуқуқий қўллаб-қувватлаш маркази ва “Диалог” нодавлат нотижорат ташкилоти билан ҳамкорликдаги “Ўзбекистонда фуқаролик жамияти ва давлат органлари ўртасида гендер тенглиги бўйича ҳамкорлик” лойиҳаси доирасида, Оила ва хотин-қизлар бошқармаси, Ички ишлар бошқармаси ҳуқуқбузарликлар профилактикаси бошқармаси ҳамда Аёлларни реабилитация қилиш ва мослаштириш Республика маркази Жиззах вилояти ҳудудий бўлими билан ҳамкорликда давра суҳбати ўтказилди.

Давра суҳбатида Оила ва хотин-қизлар бошқармаси раҳбар ва ходимлари, Ички ишлар бошқармаси ҳуқуқбузарликлар профилактикаси бошқармаси бошлиғи ўринбосари ва хотин-қизлар бўйича катта инспекторлари, хотин-қизлар бўйича маҳалла фаоллари, давлат органларининг манфаатдор идоралари ҳамда фуқаролик жамиятининг вакиллари иштирок этишди.

Суҳбат жараёнида Оила ва хотин-қизлар бошқармаси бошлиғи биринчи ўринбосари Гулнора Нормуродова, Ички ишлар бошқармаси ҳуқуқбузарликлар профилактикаси бошқармаси бошлиғи ўринбосари Сайёра Холмирзаевалар 25-ноябрь Халқаро аёлларга нисбатан зўравонликка барҳам бериш кунига бағишланган 16 кунлик “Биз зўравонликка қаршимиз” Акциясининг бугунги кундаги долзарблиги ва хотин-қизларга нисбатан тазйиқ ва зўравонликни олдини олиш, уларнинг ҳуқуқ ва манфаатларини ҳимоя қилишда муҳим ўрин эгаллаганлигини таъкидлашди.

Жиззах вилояти “Istiqlol avlodi” ижтимоий-иқтисодий, ҳуқуқий қўллаб-қувватлаш маркази ижрочи директори томонидан Наманган, Самарқанд ва Жиззах вилоятларидаги Аёлларни реабилитация қилиш ва мослаштириш марказлари ва ННТлар қошидаги Шелтерларнинг эҳтиёжлари ва талабларини ўрганиш бўйича ўтказилган таҳлил натижалари тақдимот қилинди.