“Баркамол авлод” фестивалининг футбол баҳсида Жиззах ёшлари ғолиб

Аҳолини жисмоний тарбия ва спортга жалб этиш, ёшлар ўртасида оммавий спортни ривожлантириш орқали иқтидорлиларни саралаш ва салоҳиятли ёшларни катта спорт майдонларига йўналтириш давлатимиз спорт сиёсатининг устувор вазифаларидан бири саналади.

Шу маънода мамлакатимизда уч босқичли спорт ўйинларининг муҳим бўғини – “Баркамол авлод” спорт фестивали янгича тизимда ўтаётганлиги юзлаб истеъдодларни камолга етказишда қўл келмоқда.

Қарши шаҳри мезбонлигида якунланган “Баркамол авлод-2022” спорт ўйинлари финал босқичидан ўрин олган футбол мусобақаси ҳам ушбу тамойилларга хизмат қилди.

Уч кун давом этган мусобақанинг минтақавий босқичларида зафар қучган 4 та жамоа фестивалнинг 2022 йилги ғолибини аниқлаш учун майдонга тушди.

Муросасиз баҳслар сўнгида Жиззах вилояти терма жамоаси ёшлари футбол бўйича тенгсиз жамоаси эканликларини намойиш этишди ва олтин медалларга мушарраф бўлишди.

Барча рақибларини мағлуб этиб, фақат Жиззах вилояти вакилларига имкониятни бой берган сурхондарёлик ёшлар мусобақанинг иккинчи поғонасидан жой олди. Учинчи ўрин эса Хоразм вилояти терма жамоасига насиб этди.

“Баркамол авлод” спорт фестивалининг навбатдаги финал баҳслари жорий йил 16-20 март кунлари баскетбол бўйича Навоий шаҳрида бўлиб ўтади.