Жиззах вилоятида китобхонлик ҳафталиги давом этмоқда

Жиззах шаҳридаги мусиқали драма театрида вилоят ҳокимлиги, Ахборот ва оммавий коммуникациялар агентлиги вилоят бошқармаси, Шароф Рашидов номидаги вилоят ахборот-кутубхона маркази, Маънавият-маърифат маркази, Ўзбекистон ёзувчилар уюшмаси вилоят бўлимлари, вилоят мудофаа ишлари бошқармаси ва бошқа ташкилотлар ҳамкорлигида “Китобсевар миллат” акцияси доирасида II Республика китобхонлик ҳафталиги бошланди.

Беш кун давом этадиган китобхонлик ҳафталиги китоблар кўргазмаси билан бошланди. Сўнг театр актёрлари буюк сиймолар – Алишер Навоий, Заҳириддин Муҳаммад Бобур, Жалолиддин Мангуберди, Сохибқирон Амир Темур, астроном Мирзо Улуғбек, шоир Ҳамид Олимжон, Зулфия, Шароф Рашидов образларини гавдалантирди. Асарларидан намуналар ўқилди. Ёшлар ҳам ўз ижод намуналаридан парчалар ўқиб берди.  

Ҳафталик доирасида Ўзбекистон ёзувчилар уюшмаси аъзолари Жиззах давлат педагогика, политехника институтларида, Ўзбекистон Миллий университети Жиззах вилояти филиали ҳамда Жиззахдаги Sambhram университетида бўлиб, ижодий учрашувларда иштирок этди. “Китобсевар миллат” акцияси доирасидаги китобхонлик ҳафталигининг илк куни вилоят ахборот-кутубхона марказига янги олинган адабиётлар кўргазмаси ниҳояланди. Маълумот учун, II Республика китобхонлик ҳафталиги 18-22 апрель кунлари бўлиб ўтади.