Муносабат
Энг улуғ, энг азиз байрамимиз – Ўзбекистон Республикаси Давлат Мустақиллигининг 31 йиллиги арафасида Президентимизнинг юртимиз тадбиркорлари билан мулоқоти тадбиркорларга қанот бўлди, уларга катта ғайрат ва шижоат бағишлади.
Қурилиш саноатида цемент, чарм-саноатда бўёқлар ва кимёвий моддалар, мебель саноатида МДФ, фурнитура ва аксессуарлар каби жами 82 турдаги хомашё ва ярим тайёр маҳсулотлар импорт божидан озод қилинди, натижада маҳсулотларнинг таннархини камайтириш учун шароит яратилди.
Тадбиркорлик муҳитини яхшилашга қаратилган бундай саъй-ҳаракатлар сабаб, ўтган бир йил давомида тадбиркорлар томонидан 55 мингдан ортиқ бизнес учун бинолар барпо этилди. Яъни, тадбиркорлар келажакка ишониб, кўчмас мулкка инвестиция кўпайтирмоқда. Шунингдек, тушумлари 1 миллион доллардан ошган тадбиркорлик субъектлари сони 5 мингтага ошиб, 26 мингга етди. Яна 1 минг нафари товар айланмасини 1 миллиондан 10 миллион долларгача етказди. Тадбиркорларимиздан 220 нафарининг тушумлари эса 100 миллион долларга етди.
Мамлакатимизда экспорт қилувчи корхоналар сони 7 минг 500 тага етди, умумий экспорт ҳажми 30 фоиз кўпайди.
Учрашувда Президентимиз бундай ютуқларга эришиш осон бўлмаганини, шу сабаб, тадбиркорларни фаровон ҳаётимиз бунёдкорлари, деб билишини алоҳида таъкидлаб ўтди. Айни пайтда йиғилиб қолган ва ечимини кутаётган кўплаб масалаларга эътибор қаратди ва бешта йўналишдаги ташаббусларни илгари сурди.
Унга кўра эндиликда корхоналарни тоифаларга ажратиб, уларни қўллаб-қувватлаш бўйича алоҳида ёндашув белгилаб олинади. Ушбу биринчи йўналишда корхоналар йиллик айланмаси бўйича тоифаларга ажратилади. Уларнинг 1 миллиард сўмгача бўлгани – микро бизнес, 10 миллиард сўмгача бўлгани – кичик бизнес, 100 миллиард сўмгача бўлгани ўрта бизнес тоифасига киритилади. Шундан келиб чиқиб, жорий этиладиган солиқ ставкаси 370 минг тадбиркорга енгилликлар яратади ва уларга жуда катта ишонч беради.
Тадбиркорлар учун ўз фаолиятини кенгайтириш, янги лойиҳаларни амалга ошириши учун қулай молиялаштириш тизими ташкил этилади. Кичик бизнес лойиҳаларига 20 триллион сўм йўналтирилади.
Бизнес юриб кетиши учун етарли шарт-шароит, инфратузилма ва кафолатли бозор яратиш мақсадида бундан буён ер ва мулк ажратиш ҳақидаги қарорларни бекор қилиш фақат суд тартибида амалга оширилади.
Тадбиркорларга нисбатан янги жавобгарлик ва жазо чораларини жорий этишга 3 йиллик мораторий эълон қилинади. Шунингдек, тадбиркорларга нисбатан мажбуриятлар юклайдиган янги қонун ҳужжатлари қабул қилинганида, йўл қўйган хатоси учун тадбиркорга 6 ой давомида жазо қўлланилмайди.
Келгуси йилдан 26 та идоранинг такрорланувчи назорат функциялари бекор қилинади.
Учрашув арафасида бир гуруҳ тадбиркорлар “Энг фаол тадбиркор” кўкрак нишони ва давлатимизнинг юксак мукофотлари билан мукофотланди. Улар қаторида мен ҳам “Дўстлик” орденига лойиқ кўрилганимдан хурсандман.
Мен раҳбарлик қилаётган “Al Abbos silk” масъулияти чекланган жамият пиллани қайта ишлашга ихтисослашган бўлиб, йиллик ишлаб чиқариш қуввати 150 тоннани ташкил этади. Бугунги кунда корхона Жиззах вилоятининг Арнасой ва Мирзачўл туманларида пилла етиштиради. Корхонада 50 нафар доимий ва 7 минг нафардан ортиқ мавсумий иш ўринлари яратганмиз.
Ўтган вақт давомида корхонамиз томонидан 650 минг АҚШ долларлик пилла маҳсулотлари ва ипак момиқлари тайёрланиб, улар тўлиқ хорижга экспорт қилинмоқда.
Президентимиз билан бўлган учрашув бизга ўзгача куч-ғайрат бағишлади. Куч-ғайрат билан ишга киришдик.
Холисхон Бобоева,
Жиззах шаҳридаги “Al Abbos silk” МЧЖ раҳбари
скачать dle 12.0
