Татаристон раҳбари Жиззахга келди ва “Жиззах” кимё-индустриал технопарки очилиш маросимида иштирок этди

Татаристон Республикаси раҳбари Рустам Минниханов Жиззах шаҳрига келди. Мартабали меҳмонни Бош вазир ўринбосари Жамшид Ходжаев ҳамда Жиззах вилояти ҳокими Эргаш Салиев кутиб олди.

Дастлаб, меҳмонлар “Жиззах пластмасса” АЖ негизида ташкил этилган “Жиззах” кимё-индустриал технопарки очилиш маросимда иштирок этди.

Очилиш маросимида, Татаристон Республикаси раҳбари Рустам Минниханов, Бош вазир ўринбосари Жамшид Ходжаев ва вилоят ҳокими Эргаш Салиев иштирок этиб, сўзга чиқишди.

Жорий йилнинг 20 апрель санасида  Ўзбекистон Республикаси Президентининг “Жиззах ва Тошкент вилоятларида кимё-саноат технопаркларини ташкил этиш чора-тадбирлари тўғрисида”ги қарори қабул қилинди.

Қарорга асосан, “Жиззах пластмасса” АЖ ҳудудидан ҳудуд танлаб олинди. 2022 йилнинг октябрь, ноябрь ва жорий йилнинг март ойларида “Химград” AЖ ва Россия компаниялари вакиллари ушбу корхонага ташриф буюриб, Жиззах вилоятида кимё-саноат технопаркини ташкил этиш бўйича тегишли ташкилий ишларни амалга оширди.

Таъкидлаш жоизки, “Жиззах пластмасса” аксиядорлик жамияти мамлакатимиздаги полиэтилен қувурлар, плёнкалар ва кенг турдаги халқ истеъмоли моллари ишлаб чиқарадиган йирик корхона ҳисобланади. “Жиззах пластмасса” АЖда ишлаб чиқарилаётган барча маҳсулотлар миллий ва халқаро стандартларга мос келади.

Шундан сўнг, меҳмонлар Қозон федерал университетининг Жиззах шаҳри филиалидаги тиббий таълим марказини кўздан кечиришди.

Бу ерда талабаларга яратилган шарт-шароитларни меҳмонлар юқори баҳолашиб, "Sambhram" университети ва Футбол маҳорат мактабида бўлишди.

Шунингдек, “NEW LAND” МЧЖ тикувчилик корхонасига ишчи ва хизматчилар учун яратилган қулайликлар, “Фарали” бренди остида чиқарилаётган тайёр маҳсулотлар намуналари билан танишилди ва Жиззах шаҳридаги “Олмазор” маҳалласида барпо этилган кўп қаватлик турур жойлардаги аҳолига яратилган шароитлар бўйича Татаристон раҳбари Рустам Минниханов масъуллар билан суҳбат ўтказди.

Вилоят ҳокимлиги Ахборот хизмати