Jizzax viloyatida gibrid avtomobillar va elektromobillar ishlab chiqaradigan BYD avtomobil zavodi joriy yilning iyun oyida ochilishi rejalashtirilgan. Bu haqda Oʻzbekiston Investitsiyalar, sanoat va savdo vazirligi matbuot xizmati Spotʻga maʼlum qildi.
Yanvar oyi oxirida prezident Shavkat Mirziyoyev va BYD prezidenti Van Chuanfu Jizzax viloyatida yiliga 50 ming avtomobil ishlab chiqarish quvvatiga ega elektr va gibrid avtomobillarni yigʻish loyihasini ishga tushirgan edi. Korxona “Jizzax” erkin iqtisodiy zonasi hududida boʻladi.
Mart oyida BYD vakili Ivan Sao maʼlum qilishicha, ishlab chiqarish liniyasini oʻrnatish va sozlash ishlari olib borilmoqda. Rejaga koʻra, joriy yilning uchinchi choragida yangi energiya manbalari hisobiga mahalliy ishlab chiqarilgan avtomashinalarni ommaviy yetkazib berish rejalashtirilgan.
Birinchi bosqichda zavodning ishlab chiqarish quvvati 50 ming dona avtomobilga moʻljallangan. Uning taʼkidlashicha, ushbu bosqichda uchta avtomobil modelini ishlab chiqarish rejalashtirilgan.
“Oʻzavtosanoat” AJ matbuot xizmatining Spotʻga aniqlik kiritishicha, qoʻshma avtomobil zavodi BYD Chazor va BYD Song Plus Dm-1 modellarini mayda tugunli yigʻish (CKD) yordamida ishlab chiqarishni rejalashtirmoqda.
Bundan tashqari, ishlab chiqarilayotgan elektromobillar soni ortishi bilan mahalliylashtirish darajasi bosqichma-bosqich oshib boradi.
Eslatib oʻtamiz, “Oʻzavtosanoat” va Xitoyning BYD Auto kompaniyasi Oʻzbekistonda 2022-yil avgust oyida toʻliq siklli avtomobillar ishlab chiqarishni tashkil etish boʻyicha kelishib olgan edi. Bungacha tomonlar avtomobil bozorini oʻrganishgan.
2022-yil 29-dekabrda “Oʻzavtosanoat” (60 foiz ulush) va “BYD Europe B.V.” (Niderlandiya, 40 foiz) qoʻshma korxonasi “BYD Uzbekistan Factory«ni tashkil etdi. 2023-yil 26-sentyabrda Oʻzbekiston hukumati va investor oʻrtasida loyihani amalga oshirish boʻyicha kelishuv imzolangan edi. BYD brendi 2023-yil boshidan buyon Oʻzbekistonda rasman namoyish etilmoqda.
Avval xabar berganimizdek, BYD Oʻzbekiston hukumatidan elektr va gibrid avtomobillarning «tartibsiz” importini cheklashni soʻragan edi. Bunga xususiy import qilingan modellarning mahalliy iqlim va yoʻl sharoitlariga moslashtirilmagani, shuningdek, rasmiy kafolatga ega emasligi sabab sifatida koʻrsatilgan.
Prezident Iqtisodiyot va moliya vazirligi, Investitsiyalar, sanoat va savdo vazirligi hamda “Oʻzavtosanoat” aksiyadorlik jamiyatiga raqobat toʻgʻrisidagi qonunchilik hujjatlari, shuningdek, Jahon savdo tashkiloti tamoyillaridan kelib chiqib 2024-yil 1-iyulga qadar Vazirlar Mahkamasiga BYD brendi ostidagi elektromobil va gibrid avtomobillar importini tartibga solish boʻyicha investor talabini amalga oshirishga qaratilgan takliflar kiritish topshirigʻini berdi.
Maʼlumot uchun, 2023-yilda Oʻzbekistonga 291 million dollarga 8948 dona BYD avtomobillari olib kirildi.
скачать dle 12.0
