Jizzaxda 4 ta mashina ishtirokida YTH sodir bo‘ldi

Jizzax viloyatida 4 ta mashina ishtirokida YTH sodir bo‘ldi. Bu haqda viloyat IIB JXX Yo‘l harakati xavfsizligi boshqarmasi axborot xizmati xabar berdi.

Qayd etilishicha, hodisa 4-sentyabr kuni soat taxminan 17:00 larda G‘allaorol tumani hududidan o‘tgan xalqaro ahamiyatga ega M39 yo‘lida sodir bo‘lgan.

Dastlabki maʼlumotlarga ko‘ra, yo‘lning dovon qismida harakatlanib kelayotgan “Gaz-52” yuk avtomashinasi haydovchisi nishablikda boshqaruvni yo‘qotgan.

Oqibatda ushbu yuk avtomashinasi o‘zidan oldinda bir yo‘nalishda harakatlanib ketayotgan “Captiva”ning orqa chap yon tomonidan va “Nexia-3”ning orqa tomonidan urgan. To‘qnashuv oqibatida “Nexia-3” o‘zidan oldinda bo‘lgan “Spark” avtomashinasining orqa qismiga urilgan.

Hodisa oqibatida halok bo‘lganlar yo‘q. “Nexia-3” avtomashinasi yo‘lovchisiga birinchi tez tibbiy yordam ko‘rsatilgan.

Hodisa joyini ko‘zdan kechirish va rasmiylashtirish vaqtida avtomobil yo‘lida tirbandlik yuzaga kelgan.