Инвестициялар, саноат ва савдо вазирлиги маълумотига кўра, бу тадбир кўп томонлама ривожланиш банки қатнашчилари сони бўйича иккинчи ўринда туради, шунингдек, Жаҳон банки ва Осиё тараққиёт банкининг йирик ҳамкорларидан бири ҳисобланади.
ОИИБнинг йиллик йиғилиши "Барча учун барқарор инфратузилма яратиш" мавзусига бағишланади, унда Осиёда инфратузилма ривожланишидаги ютуқлар ёритилади, ҳозирда мавжуд бўлган ҳамда келажакдаги муаммолар ва ечимлар кўриб чиқилади. Икки кунлик конференция тўртта юқори даражали йўналишни ўз ичига олади: расмий ва мунозарали дастурлар, ОИИБ ташаббуси ва фуқаролик жамияти билан мулоқотлар.
Мезбон давлат сифатида Ўзбекистон ОИИБ томонидан молиялаштирилган сув сектори бўйича инфратузилмани мустаҳкамлаш бўйича олиб борилаётган саъй-ҳаракатларини намойиш этади ва Самарқанд, Жиззах ҳамда Шерободда дунёдаги етакчи қайта тикланувчи энергетика компанияси Masdar томонидан ишлаб чиқилган Марказий Осиёдаги энг йирик қуёш энергияси лойиҳаси қурилиши жараёнини кўрсатади. Мунозаралар давомида ресурсларни жалб қилиш ва стратегик ҳамкорлик имкониятлари ҳам муҳокама қилинади.
Расмий дастур доирасида ОИИБ раҳбарлари ва банкка аъзо давлатлар юқори мартабали вакиллари иштирокида давра суҳбатлари ва битимлар имзолаш маросимлари бўлиб ўтади.
Мунозарали дастур учта мавзули оқимга бўлинади:
- "Барқарор инфратузилма" сессиялари йўлларни ривожлантириш, минтақавий алоқалар, инфратузилма лойиҳаларининг барқарорлиги ва «яшил» молиялаштириш масалаларига бағишланади;
- "Барча учун инфратузилма" оқимида молиялаштиришнинг инновацион усуллари, соғлиқни сақлаш ва иқлим ўртасидаги боғлиқлик ҳамда гендер масалалари кўриб чиқилиб, инфратузилмани инклюзив ривожлантиришга янги қарашлар берилади;
- хусусий сектор бўйича сессияларда барқарор ривожланиш учун хусусий капитални жалб қилиш, амалий ечимлар ва инвестиция имкониятларини намойиш этиш масалалари муҳокама қилинади.
