Баландчақир ҳудудидаги Ўзбекистон ва Тожикистон чегарасида янги чегара пункти очилади

Ўзбекистон Республикаси ташқи ишлар вазирининг биринчи ўринбосари Илҳом Неъматов «РИА Новости»га берган интервьюсида хабар қилишича, Тожикистон томонининг илтимосига кўра расмий Тошкент Ўзбекистон-Тожикистон чегарасида яна бир чегара пункти очиш масаласини кўриб чиқмоқда. 

«Ўзбекистон ва Тожикистон ўртасида уч йил олдин ҳамма нарса ёпиқ эди. Келишув туфайли биз 16та ўтказиш пунктини очдик - уларнинг иккита ёки учтаси илгари ҳам ишлаган, лекин транспорт воситалари ва одамларнинг ўтиши нисбатан чекланган бўлган. Ҳозирда ўн олтита пунктнинг барчаси кеча-ю кундуз ишлаяпти. Ўн еттинчиси яқинда очилди. Тожикистон томонининг илтимосига кўра ҳозир ўн саккизинчи чегара пунктини очиш масаласи устида ишламоқдамиз», - деди Илҳом Неъматов.

Дипломатнинг аниқлик киритишича, янги чегара ўтиш жойи Жиззах вилоятининг Янгиобод туманидаги Баландчақир аҳоли пунктида жойлашади.