Жиззах вилояти ҳокими Мирзачўл тумани ахборот-кутубхона марказига 527 нусхада китоб совға қилди

Жиззах вилояти ҳокими Эргаш Салиев Мирзачўл тумани ахборот-кутубхона марказига “Жаҳон ва ўзбек адабиёти дурдоналари кутубхонаси”дан ўрин олган 527 нусхада китоб совға қилди.

Давлатимиз раҳбари томонидан – ёшларга эътиборни кучайтириш, уларни маданият, санъат, жисмоний тарбия ва спортга кенг жалб этиш, уларда ахборот технологияларидан фойдаланиш кўникмаларини шакллантириш, ёшлар ўртасида китобхонликни тарғиб қилиш ҳамда хотин-қизлар бандлигини таъминлаш борасида илгари сурилган 5 та муҳим ташаббус ижросини таъминлаш мақсадида Жиззах вилоятининг барча шаҳар ва туманларида хайрли ишлар амалга оширилмоқда.

Ана шу ташаббусларнинг тўртинчиси – ёшлар маънавиятини юксалтириш, улар ўртасида китобхонликни кенг тарғиб қилиш мақсадида Мирзачўл тумани ахборот-кутубхона марказида “Китоблар оламига саёҳат” номли китоб кўргазмаси ташкил этилди.

Кўргазмада жаҳон адабиёти, болалар адабиёти, бадиий адабиётлар тўплами, энциклопедия, қўлланмалар ва илмий адабиётлар ҳам намойиш этилди.

– Кутубхонамиз фонди яна янги адабиётлар билан бойиди, – дейди туман ахборот кутубхона маркази директори Р.Бобоев. – Келажакда китоб фондимиз бунданда бойишига ва вилоятимиз раҳбарининг ушбу хайрли ташаббусини бошқа раҳбарлар ҳам қўллаб-қувватлашига ишончим комил.

Янги келган бадиий адабиётлар йиғилган ёш китобхонлар ва мирзачўллик адабиёт ихлосмандларида чуқур таасурот қолдирди.