Фориш туманида янги мактабгача таълим ташкилоти фойдаланишга топширилди

Фориш туманида мактабгача ёшдаги болаларни мактабгача таълим ташкилотларига қамраб олиш борасида йилдан йилга яхши натижаларга эришиб келиняпти.

Бундан беш йил олдин туманда бор йўғи 5 та давлат мактабгача таълим ташкилоти бўлиб, уларга атига 410 нафар ўғил-қизлар қамраб олинган бўлса, бугунги кунда туманда мактабгача таълим ташкилотлари сони 83 тага етиб, 6300 нафардан зиёд ўғил-қизлар қамраб олинган.

Яқинда туманнинг 3-сектор ҳудудидаги “Оқтом” маҳалласида 100 ўринли янги давлат мактабгача таълим ташкилоти фаолияти йўлга қўйилди. Ушбу икки қаватли бинони бунёд этиш учун 3 миллиард 733 миллион сўм маблағ сарфланди. Мазкур давлат мактабгача таълим ташкилоти фаолиятининг йўлга қўйилиши ҳисобига маҳалладаги 20 нафар хотин-қизлар бандлиги таъминланди.