Жиззах вилоят ҳокимининг ўринбосари Назира Мухторова иштирокида матбуот анжумани ўтказилди

Жиззах вилоят ҳокимининг ўринбосари, Оила ва хотин-қизлар бошқармаси бошлиғи Назира Мухторова иштирокида «Хотин қизларни қўллаб-қувватлаш уларнинг жамият ижтимоий-сиёсий ҳаётида фаоллигини ошириш борасида амалга оширилган ишлар» мавзусида матбуот анжумани ўтказилди.

Матбуот анжуманини вилоят ҳокимлиги Ахборот хизмати раҳбари – вилоят ҳокимининг матбуот котиби Акмал Биноқулов очиб берди.

Шундан сўнг, вилоят ҳокимининг ўринбосарири, Оила ва хотин-қизлар бошқармаси бошлиғи Назира Мухторова матбуот анжумани бўйича сўзга чиқди.

Эҳтиёжманд оилалардаги 1 796 нафар қизларга олий таълим муассасаларига имтиёзли 4 фоизли квота асосида ўқишга қабул қилиниши учун тавсияномалар берилиб, 199 нафари олий таълим муассасаларига қўшимча давлат гранти асосида қабул қилинган бўлса, олий таълим муассасаларида таҳсил олаётган эҳтиёжманд оилалардан бўлган 1 750 нафар талаба хотин-қизларнинг контракт тўловлари тўлаб берилгани ота-онасидан айрилган муҳтож қизлар ва боқувчиси йўқ ёлғиз аёлларнинг жамиятда ўз ўрнини топишлари учун улкан имконият эшикларини очди.

2023 йилда Жиззах вилоятида 60 157 нафар (меҳнатга лаёқатли ишсиз хотин-қизлар 37 152 нафар) хотин-қизларнинг бандлигини таъминлашга кўмаклашилди.
Шунингдек, оилавий тадбиркорликни ривожлантириш истагида бўлган 17 333 нафардан ортиқ хотин-қизларга 222 млрд сўм имтиёзли кредит маблағлари ажратилди.
2023 йилда 10 мингдан ортиқ хотин-қизлар касб-ҳунар ва тадбиркорликка ўқитилди.
2023 йилда 38 минг 4 нафар хотин-қизлар «Аёллар дафтари»га киритилиб, йил давомида 37 минг 792 нафари (99,4%)нинг муаммолар ҳал этилишига эришилди.

«Янги Ўзбекистон бўйлаб саёҳат қил!» шиори остида «Аёллар дафтари»га киритилган 2 094 нафар хотин-қизлар саёҳатга юборилди.

Матбуот анжумани якунида иштирокчилар ўзларини қизиқтирган саволларга жавоб олишди.

Вилоят ҳокимлиги Ахборот хизмати