Жиззахда 8 –март Халқаро хотин-қизлар куни нишонланди
05 март 2024 г304Комментарии: 0
Жиззах вилоят ҳокимлиги Анжуманлар саройида 8 март – Халқаро хотин-қизлар куни муносабати билан байрам тадбири ўтказилди.
Тадбирда вилоят ҳокими Эргаш Салиев иштирок этди ва “Аввало, сиз, азизларни, сизларнинг тимсолингизда бутун Жонажон Жиззахимизнинг хотин-қизларини 8 март — Халқаро хотин-қизлар куни байрами билан чин қалбимдан самимий муборакбод этаман. Барчангизга ўзимнинг юксак ҳурматим ва эзгу тилакларимни билдираман” деб барчани самимий муборакбод этди.
Вилоятда 2023 йилда 30 664 нафар хотин-қизлар турли соҳалардаги корхона ва ташкилотларга ишга жойлаштирилди.
“Ҳар бир оила-тадбиркор” дастури асосида оилавий тадбиркорликни ривожлантириш истагида бўлган 17 333 нафар хотин-қизларга тижорат банклари томонидан 222 млрд 805 млн сўм имтиёзли кредит маблағлари ажратилди.
Ўтган йил давомида 10 016 нафардан ортиқ хотин-қизлар касб-ҳунар ва тадбиркорликка ўқитилди. Маҳаллалардаги 38 004 нафар хотин-қизлар “Аёллар дафтари”нинг 4-босқичи рўйхатига киритилиб, 2023 йилда уларнинг 37 792 нафарининг муаммолар ҳал этилди.
10 026 нафар ижтимоий ҳимояга муҳтож ишсиз хотин-қизлар янги иш ўринлари ва жамоат ишларига жойлаштирилди. 3 700 нафар аёлларга тадбиркорлик фаолиятларини йўлга қўйишлари учун имтиёзли кредитлар ажратилди.
Шунингдек, Оила ва хотин-қизлар мақсадли жамғармаси маблағлари ҳисобидан ва бошқа манбалар ҳисобидан 4194 нафар хотин-қизлар ва уларнинг фарзандларини даволатиш учун 4.4 млрд. сўм маблағ ажратилди. 442 нафар хотин-қизлар реаблитация воситалари билан таъминланди. "Аёллар дафтари"га киритилган 115 нафар хотин-қизларнинг хонадонларига 3 млрд. 380 млн. сўмга қуёш панелларини ўрнатиб берилди.
Тантанали тадбирда турли соҳаларда меҳнат қилаётган фаол хотин-қизлар эсдалик кўкрак нишони ва вилоят ҳокими фахрий ёрлиғи билан тақдирланишди.
Тадбирда маҳаллий ижодкорларнинг чиқиши келганларни хушнуд этиб, “Яккасорой” тантаналар мажмуасида давом этган тадбир барчага манзур бўлди.
