Ўзбек футбол мухлисларининг “Сўғдиёна”дан умидлари катта

Жиззахнинг “Сўғдиёна” профессионал футбол клуби Душанбе шаҳрида ОФК кубоги учун ўтган гуруҳ баҳсларидаги барча учрашувларда ғалаба қозониб, плей-офф йўлланмасини қўлга киритгани ва бу босқичда Тожикистоннинг яна бир бошқа жамоаси “Хўжанд” билан учрашиши ҳақида аввал хабар берган эдик.

Битта учрашувдан иборат ушбу плей-офф баҳси жорий йилнинг 17-август кунига белгиланди. ОФК кубоги Марказий минтақа финал учрашуви номини олган ушбу баҳс қуръа натижасига кўра Хўжанд шаҳрида, айнан шу номдаги жамоага қарши бўлиб ўтадиган бўлди.

Улуғбек Бақоев шогирдлари ушбу ўйинда ғалаба қозониш учун астойдил тайёргарлик кўрмоқда. Жиззахликлар буни уддасидан чиқса, “Сўғдиёна” жамоаси ҳудудлараро ярим финал босқичида Гонгконг давлатининг “Istеrn Long Layons” клуби билан баҳс олиб боради. Битта ўйиндан иборат бу учрашувнинг қаерда ўтиши ҳам қуръага кўра аниқланади. 

Олдига катта мақсадларни қўйган “Сўғдиёна” ПФК гонконгликлар тўсиғидан ҳам муваффақиятли ўтишига бутун Жиззах аҳли ишонч билан қараётган бўлса, ўзбек футбол мухлисларининг “Сўғдиёна”дан умидлари катта. 

Ўзбекистоннинг амалдаги вице-чемпиони – “Сўғдиёна” Гонгконгнинг “Istеrn Long Layons” клуби устидан зафар қучган тақдирда, ҳудудлараро финал ва ОФК Кубогининг ҳал қилувчи – финал беллашуви айнан Ўзбекистонда бўлиб ўтиши белгилаб қўйилди. 

Бу эса жиззахликлар жамоаси зиммасига икки карра катта масъулият юклайди.

Умид қиламизки “Сўғдиёна” ўзбек футбол мухлислари ишончини оқлайди.