Мирзачўлда йигирмадан зиёд аёллар дастгоҳда рўмол тўқиш орқали даромад топиш имконига эга бўлдилар

Қишлоқ аҳолиси, айниқса, чекка ҳудудларда яшовчи хотин-қизлар бандлиги таъминлаш, бунинг учун самарали меҳнат турларини жорий қилиш чора-тадбирлари ўзининг амалий натижасини бермоқда.

Хусусан, Жиззах вилояти Мирзачўл тумани «Пахтазор» маҳалла фуқаролар йиғинида йигирмадан зиёд аёллар Наманган тажрибаси асосида дастгоҳда рўмол тўқиш орқали даромад топиш имконига эга бўлдилар.

— Маҳалламиз аёллари билан бирга Наманган бориб, табиий жун рўмол тўқиш сирларини ўрганиб келдик, - дейди ушбу МФЙда яшовчи Санобар Сатимова. — Энди касаначи сифатида ишлаб, пул топяпмиз. Бунинг учун Ангор эчкисининг бир кило жунини бозорлардан 265-270 минг сўмдан харид қилиб, ювиб, йигириб, ҳар килосидан 8-9 донадан табиий жун рўмоллар тўқияпмиз. Рўмолларнинг донаси 150 минг сўмдан ошиққа сотилмоқда. Бу ўзимиз учун ҳам, рўзғоримиз учун ҳам ҳар тарафлама наф келтирмоқда.